Ամուսնուս եւ երեխաներիս հետ երջանիկ ապրում էի եւ պատկերացնել անգամ չէի կարող, որ օրերից մի օր երջանկությունս կավարտվի:

Սակայն մի չարաբաստիկ օր ստացա ամուսնուս մահվան գույժը. նրան սպանել էին գումարի պատճառով, մինչդեռ շատ երիտասարդ էր` 33 տարեկան: Անպատմելի էր վիշտս, չէի կարողանում վերագտնել ինձ, բայց միևնույն ժամանակ հոգուս խորքում մի փոքրիկ խաղաղության կրակ էր նշմարվում:

Հուղարկավորությունից մի քանի օր անց մի աղջիկ եկավ մեր տուն եւ ինձ պատմեց Հիսուսի մասին: Ես առաջին անգամ էի լսում «Հիսուս» անունը, ուստի անհանգստացած հարցրի. «Արդյոք Նա կկարողանա՞ պահել իմ երեխաներին»: Նա ինձ հուսադրելով ասաց՝ «Վստահի՛ր Աստծուն, եւ ամեն ինչ լավ կլինի»: Այդ ժամանակ մեծ տղաս ութ տարեկան էր, աղջիկս` վեց, իսկ փոքր տղաս՝ ընդամենը մեկ ու կես:

Ապաշխարելուց հետո ողջ կյանքս փոխվեց, ես գտա մխիթարություն եւ ուրախություն, սակայն շատ շուտով հայտնվեցի մի դժվարին իրավիճակում. ներել…

Մարդասպանը կալանավորված էր և շուտով պետք է լիներ դատը: Հանցագործն ընդամենը 26 տարեկան երիտասարդ էր: Ես չգիտեի՝  ինչպե՞ս վարվել: Որպես քրիստոնյա՝ գիտեի, որ պետք է ներեմ, բայց ինչպե՞ս…

Այդ օրերին շարունակ լսում էի ներման մասին պատգամներ: Եվ քաջ գիտեի, որ Հիսուսն էլ Գողգոթայում է արյուն թափել իմ և ողջ աշխարհի համար…

Մոտենում էին դատարան գնալու օրերը…

Սարսափելի էր հանդիպել մի մարդու, ով ընտանիքիս վշտի պատճառն էր դարձել: Աղոթում էի, որ Աստված օգնի ինձ ներել նրան, ինչպես որ Ինքն է ներել ինձ:

Եվ Երկնային Հայրն ինձ ուժ տվեց «քայլելու» և որ ամենակարևորն է՝ ներելու…

Վերջապես ողջ էությամբ ես ներեցի նրան, որից հետո վայելեցի կատարյալ ազատություն… այլեւս ոչինչ չէր խանգարում ինձ մոտենալ Աստծուն: Չէ՞ որ Աստծո առջեւ աղոթքի կանգնելիս պետք է կարողանանք ասել` ների՛ր մեզ այնպես, ինչպես մենք ենք ներում ուրիշներին:

Հաղթահարելով այս փորձությունը` այսօր շատերին կարողանում եմ օգնել, սովորեցնել ներման իշխանության եւ զորության մասին:

Անցել են տարիներ, երեխաներս մեծացել են… Երբ մի հայացք եմ գցում դեպի անցյալը, տեսնում եմ, թե որքան հզոր էր Աստծո բազուկն իմ կյանքում. Նրա օգնությամբ կարողացա պահել եւ մեծացնել զավակներիս: Այսօր նրանք ճանաչում են Աստծուն` որպես Երկնային Հոր, եւ ծառայում Նրան:

Ներելն Աստծո պատգամն է՝ ուղղված յուրաքանչյուրիս. ներելով` ազատում ես ոչ միայն քո կյանքը` քեզ հասցված վիրավորանքների տանջանքից, այլեւ ազատում ես նրան, ով մեղավոր է եւ հնարավորություն տալիս զղջալու, փոխվելու եւ նոր կյանք սկսելու…

Ռուզաննա Հայրապետյան

Հրապարակվել է 22/10/2012 – ին